الّي تلْقاهْ راكبْ على خشْبة قلّو صحّة الجّواد

يا خويا عالنّفاقْ و التّبلعيطْ ! هاهو جْدودْنا كيفاشْ يعلّمو فينا فالتّنوفيقْ !

jamais تبْدى sincère معا العْبادْ. ديمة تبْسيمةْ على وجْهكْ و كذْبتك حاضْرة... يااااا ولاّهي تبرْكلّه عْليكْ تفتّقْ, خرْجتْ عليكْ... إنشاللّه مبْروكْ, محْلاكمْ معا بعضْكمْ... تبرْكللّه عليه ولْدك ياسرْ فايقْ (جنّ أرْقطْ)...

ياخي شنوّة يْصيرْ كيف الواحدْ يقولْ رأيو بكلّ صراحة و شفافيّة ؟ لاخرْ باشْ يتنبزْ ؟

آه حقّها نْسيتْ... ماهو أحْنا في تونس نعْملو الحاجة الّي يحبّوها العبادْ و كيما يحبّوها هوما... donc كان العبادْ ما يرْضاوشْ عليكْ تتْسمّى فاشلْ و ما عنْدكْ فالسّوق ما تذوق.

هاذاكا عْلاشْ في العْروسات مثلاً ديما ثمّة واحدْ ما عجْبتّوشْ حاجة : العروسة, الماكياج, الحلو, الjus, الغناية الثّالثة, المغنّي شاربْ كعْبة زايْدة, بلاصة الصّالة هكّاكة و برّة...

يا ولادي تعلّمو تعْملو الحاجة كيما تْحبّوها إنْتوما, على خاطرْ عمْرك ما ترضّي العباد الكلّ, sinon راهو الحاجّ كلوفْ عمْرو ما كان موْجود...

جنّة و فيها بْريكاجي

شوفْ إنْتي قمّة الطّموحْ متاعْ التّونْسي...

معْناها جنّة, par définition إلّي تطْلبْ تلْقى, و يْزيدو يْحطّولكْ فيها بْريكاجي !! معْناها تطفّي الباقي لكلّ و تبْدى تضْربْ فالبريكْ طرافْ أعْطيه... و غرْغرْ يا غرابْ !

لا و قالّكْ apparemment ما تسْتحقّشْ حتّى باشْ تقلّو تحبّ العظْمة طايْبة ولاّ رايْبة, بالكبّارْ ولاّ بلاشْ... يعْرفو عْليكْ كلّ شيء ! إنتي برْكة مدّ كرْعيك و عيّطْ يا بْريكاجي.

أنا برْجوليّة كانْ تطْلعْ الجنّة ما فيهاشْ واحدْ لاهي بْوذْنين القاضي, ما ندْخللْها كانْ بالمحامى مْتاعي...

و على ذكْر البْريكْ نتْمنّالكمْ نهايةْ رمضانْ سعيدةْ و عيدْكمْ مبْروكْ النّاسْ الكلّ ! (على فكْرة, منْ مصدرْ موْثوقْ منّو, العيدْ باشْ يكونْ يوم الجمعة إن شاء اللّه)

عيطة و شهودْ على ذبيحة قنْفود

و اللّه العضيم التّوانْسة ماهمشْ واعْيين بالقيمة نتاعْ بعْض حاجات.

السّاعة القنْفودْ حيوان مهمّ ياسرْ, أوّلاً من تالا القيمة الغذائيّة متاعو, آشْ خلاّ les tziganes ياكْلو فيه كيف الكاكاويّة, و ثانياً نتْعلّمو منّو تقْنيات قويّة ياسرْ متاعْ دفاعْ على النّفس

مثلاً كيفْ واحدْ يبْراكيكْ فالشّارع تنجّمْ tout simplement تهزّ يدّكْ و تورّيهْ الشّوكْ الّي في ضبابطكْ, تو تشوفْ كيفاشْ عبارة صبّيتْ عليه سطلْ ماء (surtout كان الحال صيف)

و لذا لازمْ كلّ حاجةْ نعْكيوْها كارْها يعيّشْكم.

ما نعْرفْش شكونْ مْشا ما نعْرفْش وينْ باشْ يزْرعْ بكّة بمناسبة مهْرجان عودْ الأراكْ في عنْق الجّملْ ؟ إيه آشْ بيه, نجيبوها فالتّلفزة... حاجة مهمّة و تسْتحقّ...

آما تقلّي آشْ بيهم ما عدّاوشْ فالتّلفزة حادثْ متاع تْرينو (صفر موتى, صفر جرْحى, صفر مفْقودينْ, صفر متْقلّقينْ, صفر تْرينو) و إلاّ مضاهراتْ مانيشْ عارفْ في أناهي نقْبة منْ بقاعْ الجمْهوريّة, آشْ راحْلكْ فيهمْ ؟ لْواشْ التّنبيرْ الزّايدْ ؟

يا خويا التّوانْسة قدّاشْ يْموتو عالحكاياتْ الفارْغة...

وقْفتْ الزّنْقة للْهاربْ

روحْ التّعاونْ و التّآزرْ و الأخوّة معادشْ موْجودة عنْد التّوانْسة.

الرّاجلْ مسْكينْ هاربْ مفْجوعْ يعْلمْ بيهْ كانْ ربّي, يجْري يجْري يلْقي روحو في زنْقة كفّ و غرْزة هوّا و الحيطْ, آشْ تْحبّو يعْملْ بْربّي ؟ يتْشعْبطْ ؟ ماهو يْقولو سارقْ ! النّاسْ ما تخلّي حدّ في خيرْ !

كانْ جاتْ الدّنْيا دنْيا راهو السّيّدْ اللّي خالطْ وراهْ يكونْ منّو العقلْ و يعْملْ روحو مرّة في حْياتو Fair Play و يوخّرْ...... يخلّيهْ يخْرجْ (عليكْ أمانْ اللّه) منْ هاكْ الزّنْقة و يبْعدْ شويّة و يحْسبْ حتّى 3 و بعْد يرْجعو يجْريوْ... ياخي ماعادشْ خيرْ فالدّنْيا ؟

تي بالللاهي و برّا كانْ شدّيتو ؟ أيّا هاكْ شدّيتو يا سيدي... هاكْ شادّو... شعْملْت توّا ؟ جبْت الصّيدْ منْ بعْبوصو ؟

تي باللّاهي أخْطاني, هيّا الحْكاية الكلّ داخْلة في حيطْ...

جا يْعاونْ فيه عْلى قبرْ بوه هْربْلو بالفاسْ

آب آب آب آب

الّطْف يا صاحبْ اللّطْف

توّا الرّاجلْ مسْكين لا يزّي بوهْ ماتْ, لا يزّي قالولو ما نحْفرولكْش أحْفر وحْدك, لا يزّي عاطْيينو فاسْ موشْ حتّى chiniole, لا يزّي في غرْغورْ القايلة كيفْ ما عنْدي توّا... و يْزيدْ لاخرْ يهْربْلو بالفاسْ ؟! تي راهو شيّ ما قالشْ بيهْ ربّي هاذا !

باللّاهي تصوّرْ روحكْ إنْت باشْ تْكونّاكْتي عالفايسْبوك و يْجي واحدْ ماصطْ يهْربْلكْ بالفايسْ متاعكْ !! بْأنا وجْه باشْ تدْخلْ ؟

وإلاّ تعْملْ هكّا نْهارْ باشْ تمْشي تقْضي منْ كارْفورْ يْجيكْ صاحْبكْ يْبدّلّكْ المنْقالة مْتاعكْ, يْحطّها نْهارْ جمْعة ! آشْ تعْملْ ؟ تْروّحْ للدّارْ بسْتيكة "Oh" ؟

تي خلّيوْ الرّاجلْ يحْفرْ رايضْ يا ديني !!!

دارْ النّجّارْ بْلا بابْ

و ثمّا زادا شْكونْ يْقول "بابْ النّجّارْ مْكسّرْ" وإلاّ "بابْ النّجّارْ مْحطّمْ" جمْلة وحْدة.

المثلْ هاذا يْفكّرْني في السّيري متاعْ الفرنسيسْ "Le comble de..." متاعْ الحاجات الّي تْنطّقكْ منْ جْنابكْ و تْقيّمْ الميّتْ منْ قبرو.

هوا راهو المثلْ هاذا بالذّاتْ متاعْ النّجّارْ تْنجّمْ تفْهمْ عْلاشْ ما عنْدوشْ بابْ, عْلى خاطرْ اللّوحْ ولاّ نارْ (بالعرْبي ياسرْ غْلا), عادْ اللّوحْ الّي باشْ يعْملْ بيهْ بابْ لْروحو موشْ كانْ يْبيعو خيرْ ؟ عادا يقْعدْ بْلاشْ بابْ و يْحطّ كلْبْ عرْبي يْعسّ عالدّارْ, après tout الكْلابْ العْربْ أهوكمْ بْزايد, عْلا شْكونْ ترْضا...

و نْزيدكْ زْيادة, أبْرزتْ دراسة حديثة عْملْها المعْهد الوطني للتّنسْتيستيك, مشْكورْ, أنّو 83% مالنّجّارة طلْعو écolo (شوفْ يا سيدك) و يهْتمّو ياسرْ بالطّبيعة و المحافظة عالبيئة و إحياءْ المساحاتْ الخضراءْ, إينعم.

طاحْشي الكفّ عْلا ظلّو ؟

حاجة بركة, آنا نْضنّ إلّي المثلْ هاذا ماعادشْ à la mode, لذا نقْترحْ عْلى السّلطاتْ المعْنيّة إنّهمْ يْبدّلوهْ بْحاجة كيما :

• 
  
  نومرو الhotline مْتاعْ Tunisiana هورْ ريزو
• 
  
  iPhone و ماهوشْ تاتْشْ
• 
  
  بورا بورا sans alcool
• 
  
  كورة بلاشْ جْبورة

أوْ حاجة منْ هاذا القبيلْ

و لكمْ سديدْ النّظرْ...

هاني جيتكم يا ولاد و بنات تونس ال...خضراء

هيّا سْلام عْليكم

توّا عندي مدّة وانا نحبّ نلنْسي هالمدوّنة و ما سهّلش فيها ربّي, كلّ مرّة نقول "خلّي بعْد الكوب دي موند..."

عادْ كيف المرّة هاذي أبْدعو فيها الفرقْ لْكلّ - تبرْكللّه و عيني ما تضرّهمْ - قلْت تمْشيشي الفيديراسيونْ يوقّفو الضّرب (المهْزلة) غادي و يْقولو ماعادشْ عامْلين كوبْ دي مونْد, ماني نعرفْهمْ عنْدهم كي صبّلي نشْرب, و تْرصّيلي خوكمْ بْلاشْ بلوقْ...

دوووويوْ !

و علا ضوءْ هذه المعلومات قرّرْتْ باشْ نْجي نونّسكم فالبْلوقوسْفارْ (برْشا أصفار عالّيسار و عالّيمين) و إبْتداءً من نهار الأحد الجّايْ (ولاّ الّي بعْدو, ça dépend) و كلّ نهارْ أحد باشْ نحْكيلكمْ عْلى واحدْ من الأمثالْ الشّعْبيّة ولاّ المقولاتْ التّونسيّة و نْحاولو نْفسّرو معانيهمْ و إسْتعمالاتْهمْ.

و بالمناسْبة كانْ عنْدكمْ إقْتراحاتْ و إلّا ملاحْظاتْ تْنجّمو بكلّ ترْبية و ديمقْراطيّة تْحطّوهمْ في... كومّنتار عالصّفْحة هاذي و إلاّ عالباجْ فايْسْبوك.

هيّا بْخاطرْكمْ...