البقرة كيف تطيح... تكثر سكاكنها !!

يا سبحان الله

عندي توّة 3 أيام وانا نسمع في الكرتوش و نصلّي عالنّبي و ساعات كيف النّاس الكلّ نعمل دورة على الأنترنات, أو بالعربي على facebook

و راني حاولت نسكت و قلت أخطاني مالكلوف أما الله غالب... الclavier ياكل فيّا !

توّا يا رسول الله تسعين مليار تونسي شجاع, أسد ! (خسارة ما ثمّاش majuscule في العربيّة) هاذوما إلّي يصوّرو في رواحهم و إلآ يصوّرو فيهم و يحطّوهم عالفايسبوك, و العباد تشجّع و تصفّق و الlike قريب باش يقطّع روحو و العباد تبرتاجي, و السيّد يسبّ في بن علي, و الطّرابلسيّة, و التّجمّع, والشواطن لكلّ, و هاذاكا عمل, و هاذاكا سرق

أوّلا, الشئ هاذا لكلّ نعرفوه, موش نستنّاو فيكم إنتوما باش تحكيولنا عليهم, بارك الله فيكم

ثانيا, وين كنتو يا أبطال, يا شجعان قبل شهر و شهرين و عام و عامين ؟ ماهو ثمّا فساد و ثمّا فايسبوك, آشبي أمّك ما تكلّمتش ؟ ياخي الفأر يتسمّا شجاع وقة إلّي يخرج بعد ما يموت القطّوس ؟

هيّا مالا كيف حلّيتو جلغتكم هاني باش نردّ عليكم

تلومو على بن علي كيفاش خايف من أروبا و أماريكا ؟ و إنتوما ما كنتوش خايفين منّو و من جماعتو ؟

تلومو على الدّول الأروبيّة و العربيّة و الأمريكيّة كيفاش كانو ساكتين على الوضع في تونس ؟ ياخي ما كنتوش ساكتين على رواحكم أكثر من عشرين سنة ؟

ياخي موش البارح في الأيّام النّاس الّي كانو يتكلّمو في عائلاتكم و جيرانكم و أصحابكم تقولولهم آش مدخّلك و أخطاك و فكّ علينا مالمشاكل ؟

هاكم تنساو فيسع... إن شاء الله الدّرس الجديد ما تنساوهش بعد شهر أو إثنين

إن شاء الله ما تنساوش زادا إلّي في الأيّام هاذي و بعد سقوط بن علي حتّى حزب معارض ما كان قريب للشّعب باش يعاونو و يوجّهو و يأطّرو و يطمأنو

شطرهم راكشين في الخارج يضربو في ال moules-frites  و يستنّاو حتّى الأمن يستتبّ و يجيو هوما كيف سيدي الباي يحطّو تراميهم عالكرسي هناااااني بناني

ما نحكيش على وسائل الإعلام... ولّا بدّلولكم إسم تونس 7 يزّي هاذيكا أهمّ حاجة ؟

بن علي قطّع الرّبط, و يعطيكم الصّحّة الكلّ

بن علي شيطان, لاكن التّوانسة ماهمش ملائكة, أبداو برواحكم كان بالحقّ تحبّو تصلّحو

ربّي يرحم شهداءنا و يحمي شعبنا و يفكّ أزمتنا

الّي تلْقاهْ راكبْ على خشْبة قلّو صحّة الجّواد

يا خويا عالنّفاقْ و التّبلعيطْ ! هاهو جْدودْنا كيفاشْ يعلّمو فينا فالتّنوفيقْ !

jamais تبْدى sincère معا العْبادْ. ديمة تبْسيمةْ على وجْهكْ و كذْبتك حاضْرة... يااااا ولاّهي تبرْكلّه عْليكْ تفتّقْ, خرْجتْ عليكْ... إنشاللّه مبْروكْ, محْلاكمْ معا بعضْكمْ... تبرْكللّه عليه ولْدك ياسرْ فايقْ (جنّ أرْقطْ)...

ياخي شنوّة يْصيرْ كيف الواحدْ يقولْ رأيو بكلّ صراحة و شفافيّة ؟ لاخرْ باشْ يتنبزْ ؟

آه حقّها نْسيتْ... ماهو أحْنا في تونس نعْملو الحاجة الّي يحبّوها العبادْ و كيما يحبّوها هوما... donc كان العبادْ ما يرْضاوشْ عليكْ تتْسمّى فاشلْ و ما عنْدكْ فالسّوق ما تذوق.

هاذاكا عْلاشْ في العْروسات مثلاً ديما ثمّة واحدْ ما عجْبتّوشْ حاجة : العروسة, الماكياج, الحلو, الjus, الغناية الثّالثة, المغنّي شاربْ كعْبة زايْدة, بلاصة الصّالة هكّاكة و برّة...

يا ولادي تعلّمو تعْملو الحاجة كيما تْحبّوها إنْتوما, على خاطرْ عمْرك ما ترضّي العباد الكلّ, sinon راهو الحاجّ كلوفْ عمْرو ما كان موْجود...

جنّة و فيها بْريكاجي

شوفْ إنْتي قمّة الطّموحْ متاعْ التّونْسي...

معْناها جنّة, par définition إلّي تطْلبْ تلْقى, و يْزيدو يْحطّولكْ فيها بْريكاجي !! معْناها تطفّي الباقي لكلّ و تبْدى تضْربْ فالبريكْ طرافْ أعْطيه... و غرْغرْ يا غرابْ !

لا و قالّكْ apparemment ما تسْتحقّشْ حتّى باشْ تقلّو تحبّ العظْمة طايْبة ولاّ رايْبة, بالكبّارْ ولاّ بلاشْ... يعْرفو عْليكْ كلّ شيء ! إنتي برْكة مدّ كرْعيك و عيّطْ يا بْريكاجي.

أنا برْجوليّة كانْ تطْلعْ الجنّة ما فيهاشْ واحدْ لاهي بْوذْنين القاضي, ما ندْخللْها كانْ بالمحامى مْتاعي...

و على ذكْر البْريكْ نتْمنّالكمْ نهايةْ رمضانْ سعيدةْ و عيدْكمْ مبْروكْ النّاسْ الكلّ ! (على فكْرة, منْ مصدرْ موْثوقْ منّو, العيدْ باشْ يكونْ يوم الجمعة إن شاء اللّه)

عيطة و شهودْ على ذبيحة قنْفود

و اللّه العضيم التّوانْسة ماهمشْ واعْيين بالقيمة نتاعْ بعْض حاجات.

السّاعة القنْفودْ حيوان مهمّ ياسرْ, أوّلاً من تالا القيمة الغذائيّة متاعو, آشْ خلاّ les tziganes ياكْلو فيه كيف الكاكاويّة, و ثانياً نتْعلّمو منّو تقْنيات قويّة ياسرْ متاعْ دفاعْ على النّفس

مثلاً كيفْ واحدْ يبْراكيكْ فالشّارع تنجّمْ tout simplement تهزّ يدّكْ و تورّيهْ الشّوكْ الّي في ضبابطكْ, تو تشوفْ كيفاشْ عبارة صبّيتْ عليه سطلْ ماء (surtout كان الحال صيف)

و لذا لازمْ كلّ حاجةْ نعْكيوْها كارْها يعيّشْكم.

ما نعْرفْش شكونْ مْشا ما نعْرفْش وينْ باشْ يزْرعْ بكّة بمناسبة مهْرجان عودْ الأراكْ في عنْق الجّملْ ؟ إيه آشْ بيه, نجيبوها فالتّلفزة... حاجة مهمّة و تسْتحقّ...

آما تقلّي آشْ بيهم ما عدّاوشْ فالتّلفزة حادثْ متاع تْرينو (صفر موتى, صفر جرْحى, صفر مفْقودينْ, صفر متْقلّقينْ, صفر تْرينو) و إلاّ مضاهراتْ مانيشْ عارفْ في أناهي نقْبة منْ بقاعْ الجمْهوريّة, آشْ راحْلكْ فيهمْ ؟ لْواشْ التّنبيرْ الزّايدْ ؟

يا خويا التّوانْسة قدّاشْ يْموتو عالحكاياتْ الفارْغة...

وقْفتْ الزّنْقة للْهاربْ

روحْ التّعاونْ و التّآزرْ و الأخوّة معادشْ موْجودة عنْد التّوانْسة.

الرّاجلْ مسْكينْ هاربْ مفْجوعْ يعْلمْ بيهْ كانْ ربّي, يجْري يجْري يلْقي روحو في زنْقة كفّ و غرْزة هوّا و الحيطْ, آشْ تْحبّو يعْملْ بْربّي ؟ يتْشعْبطْ ؟ ماهو يْقولو سارقْ ! النّاسْ ما تخلّي حدّ في خيرْ !

كانْ جاتْ الدّنْيا دنْيا راهو السّيّدْ اللّي خالطْ وراهْ يكونْ منّو العقلْ و يعْملْ روحو مرّة في حْياتو Fair Play و يوخّرْ...... يخلّيهْ يخْرجْ (عليكْ أمانْ اللّه) منْ هاكْ الزّنْقة و يبْعدْ شويّة و يحْسبْ حتّى 3 و بعْد يرْجعو يجْريوْ... ياخي ماعادشْ خيرْ فالدّنْيا ؟

تي بالللاهي و برّا كانْ شدّيتو ؟ أيّا هاكْ شدّيتو يا سيدي... هاكْ شادّو... شعْملْت توّا ؟ جبْت الصّيدْ منْ بعْبوصو ؟

تي باللّاهي أخْطاني, هيّا الحْكاية الكلّ داخْلة في حيطْ...